1. Ofruesi dhe fusha
PRIeSIM është emër tregtar i PRCONNECT SH.P.K.. PRCONNECT është pala kontraktuese dhe shitësi/rishitësi i pakove eSIM që furnizohen përmes partnerëve teknikë dhe të telekomunikimit. PRCONNECT nuk operon rrjetin lokal të qasjes radio; lidhja ofrohet nga operatori lokal i treguar te pakoja. Shërbimet e rregulluara të palëve të treta identifikohen në rrjedhën përkatëse. Asgjë në këto kushte nuk kufizon ndonjë detyrim rregullator, regjistrim ose licencë që mund të zbatohet.
Këto kushte vlejnë për priesim.com, aplikacionet PRIeSIM për iOS/Android, pakot dhe rimbushjet eSIM. Kushtet specifike të pakos, të shfaqura para pagesës, plotësojnë këto kushte. Sigurimi në udhëtim është shërbim i veçantë i PRISIG-ut dhe nuk rregullohet nga këto kushte eSIM.
2. Produkti eSIM
Blen një profil dixhital eSIM dhe të drejtën për ta përdorur paketën e të dhënave sipas destinacionit, kuotës, vlefshmërisë, rrjeteve dhe kufizimeve të shfaqura para pagesës. Pakot zakonisht janë vetëm për internet; thirrje, SMS ose numër telefoni përfshihen vetëm kur shkruhet qartë. “Pa limit” mund t’i nënshtrohet përdorimit të drejtë, uljes së shpejtësisë ose kufizimeve të hotspot-it të treguara te pakoja.
3. Pajisja, instalimi dhe aktivizimi
Para blerjes verifiko që pajisja mbështet eSIM, nuk është e bllokuar nga operatori dhe punon në destinacion. QR/LPA mund të jetë njëpërdorimësh; mos e ndaj publikisht dhe mos e fshi profilin pas instalimit. Fillimi i vlefshmërisë mund të ndodhë në instalim, aktivizim ose lidhjen e parë, sipas pakos.
4. Çmimi dhe pagesa
Çmimi përfundimtar dhe çdo zbritje ose tarifë shfaqen në euro para konfirmimit. Pagesa përpunohet nga banka ose ofruesi i pagesës i treguar në arkë. Ne nuk ruajmë numrin e plotë të kartelës, CVC/CVV-në ose kredencialet e portofolit.
Ruajtja e kartelës ofrohet vetëm kur arka e shfaq atë mundësi dhe është opsionale. Kërkon zgjedhje të veçantë “Ruaje këtë kartelë”. ProCard/Paysera KS mban të dhënat e plota të kartelës dhe mund të lëshojë token për ripagesë. Ne mund të ruajmë tokenin të enkriptuar, fingerprint-in e tij me çelës, ofruesin dhe llojin e kartelës, katër shifrat e fundit, si dhe kohën/versionin e pëlqimit dhe porosinë burimore. Nuk ruajmë numrin e plotë ose CVC/CVV-në. Heqja e kartelës e fshin kriptografikisht tokenin e përdorshëm dhe revokon pëlqimin e mëparshëm. Pagesa e ardhshme me kartelë të ruajtur, nëse aktivizohet, duhet të niset për një porosi konkrete; nuk është abonim ose rinovim automatik.
Pagesa me kripto ofrohet vetëm kur shfaqet në arkë për platformën, llogarinë, shumën dhe monedhat e disponueshme. Nëse e zgjedh, kalon te faqja e strehuar e NOWPayments, ku shfaqen rrjeti, adresa, shuma, afati dhe memo/tag-u i saktë. Duhet t’i ndjekësh saktësisht ato udhëzime. NOWPayments përpunon pagesën sipas kushteve dhe privatësisë së vet. PRCONNECT nuk të ofron portofol, këmbim ose kujdestari kripto. Disponueshmëria mund të hiqet pa prekur pagesën me kartelë.
5. Krijimi dhe dorëzimi i porosisë
Para pagesës mund të krijohet një porosi në pritje ose një referencë pagese. Porosia pranohet për furnizim vetëm pasi pagesa të konfirmohet. QR-ja dhe udhëzimet shfaqen te “eSIM-et e mia” dhe dërgohen me email. Verifikimi i pagesës ose furnizuesi mund të shkaktojë vonesë. Një pagesë e dështuar, e anuluar, e skaduar ose e kthyer nuk krijon të drejtë për furnizim. Për një dhuratë, blerësi e bën porosinë, jep pëlqimin dhe pranimin sipas pikës 6 dhe merr konfirmimin e pagesës; marrësi e merr eSIM-in me email dhe nuk ka nevojë për llogari.
6. Furnizimi i menjëhershëm dhe tërheqja
Sipas Ligjit Nr. 06/L-034 për Mbrojtjen e Konsumatorit, konsumatori në përgjithësi ka 14 ditë për t’u tërhequr nga kontrata në distancë. E drejta nuk humbet vetëm pse eSIM-i është porositur ose paguar. Për përmbajtje digjitale pa mjet të prekshëm, përjashtimi zbatohet vetëm kur plotësohen kushtet ligjore, përfshirë pëlqimin paraprak të shprehur për fillim gjatë periudhës së tërheqjes, pranimin se, duke dhënë këtë pëlqim, konsumatori e humb të drejtën ligjore të tërheqjes sapo të fillojë furnizimi, dhe konfirmimin e kërkuar në mjet të qëndrueshëm. Nëse furnizimi nuk ka filluar, kushtet nuk janë plotësuar ose informacioni/konfirmimi i kërkuar nuk është dhënë, e drejta ligjore mund të mbetet; mosdhënia e informacionit për tërheqjen mund ta zgjasë afatin sipas ligjit. Mjetet detyruese për mosdorëzim, defekt ose mospërputhje mbeten në çdo rast. Për çdo porosi të paguar dhe për çdo rimbushje, këtë pëlqim dhe këtë pranim t’i kërkojmë në arkë, para pagesës dhe veçmas nga pranimi i këtyre kushteve, dhe email-i i konfirmimit të porosisë i përsërit ato.
7. Mbulimi, përdorimi dhe pezullimi
Disponueshmëria, shpejtësia dhe cilësia varen nga operatorët lokalë, mbulimi, pajisja, lokacioni dhe mirëmbajtja. Ndalohet rishitja pa autorizim, mashtrimi, përdorimi i paligjshëm, cenimi i sigurisë dhe shmangia e qëllimshme e kufizimeve. Mund ta pezullojmë shërbimin kur është e nevojshme dhe proporcionale për siguri, ligj ose parandalim mashtrimi.
8. Llogaria, pranimi dhe komunikimet
Kur krijon llogari me email, Google ose Apple, i pranon këto kushte dhe Politikën e rimbursimit, si dhe konfirmon se e ke lexuar Politikën e privatësisë. Çdo porosi dhe rimbushje rregullohet nga versioni i këtyre kushteve që është në fuqi në momentin kur bëhet; lidhja për atë version shfaqet pranë butonit të pagesës dhe versioni i bashkëngjitet konfirmimit të porosisë. Je përgjegjës për email-in e saktë dhe sigurinë e llogarisë. Email-et e porosisë, sigurisë, QR-së, faturës dhe mbështetjes janë komunikime kontraktuale. Ofertat, lajmet dhe kërkesat opsionale për vlerësim dërgohen vetëm nëse zgjedh t’i marrësh dhe mund t’i ndalësh në çdo kohë te profili yt ose përmes lidhjes që gjendet në çdo mesazh të tillë.
9. Rimbursimet dhe ankesat
Shih Politikën e rimbursimit për tërheqjen, defektet, rimbursimet dhe formularin model. Ankesa mund të bëhet te “eSIM-et e mia”, në info@priesim.com ose WhatsApp +383 48 441 256. Jep numrin e porosisë dhe përshkrimin, por mos dërgo QR/LPA. E konfirmojmë pranimin me email dhe përgjigjemi brenda afatit të kërkuar nga ligji i zbatueshëm; rastet teknike komplekse mund të kërkojnë diagnozë proporcionale.
10. Përgjegjësia, ligji dhe ndryshimet
Nuk përjashtojmë përgjegjësi, garanci ligjore ose mjete juridike që ligji nuk lejon të përjashtohen. Para porosisë që krijon detyrim pagese, karakteristikat kryesore, çmimi total, mënyrat e pranuara të pagesës, kufizimet e furnizimit dhe informacioni për tërheqjen duhet të paraqiten qartë, ndërsa kontrolli i porosisë duhet ta bëjë të qartë detyrimin për pagesë. Këto kushte rregullohen nga ligjet e Republikës së Kosovës dhe gjykatat kompetente në Prishtinë, pa ia hequr konsumatorit mbrojtjen detyruese të ligjit të vendbanimit. Ligji Nr. 06/L-034 dhe rregullat e tjera detyruese të konsumatorit mbizotërojnë ndaj çdo kushti të papajtueshëm. Versionet e reja vlejnë për porositë dhe rimbushjet e bëra nga data e hyrjes së tyre në fuqi dhe nuk ndryshojnë porositë e përfunduara. Klientët e regjistruar i njoftojmë me email ose në aplikacion për ndryshimet thelbësore, para se këto të hyjnë në fuqi.
11. Kreditet PRIeSIM
Ky seksion vlen vetëm për cashback-un promocional. Wallet-i i rimbursimeve rregullohet veçmas më poshtë.
(a) Çfarë janë. Kreditet PRIeSIM janë kredite promocionale në euro për blerje në PRIeSIM, të lidhura me llogarinë tënde PRIeSIM. Nuk janë para dhe as para elektronike, nuk kanë vlerë në para të gatshme dhe nuk mund të tërhiqen, të këmbehen, t’i kalohen dikujt tjetër ose të përdoren jashtë PRIeSIM-it.
(b) Si fitohen. Për çdo porosi të re të një pakoje eSIM që e paguan në euro me kartelë në arkë, fiton kredite në vlerë prej 5% të shumës që i tarifohet realisht kartelës tënde, pas zbritjeve dhe pa kreditet e përdorura; kjo vlerë rrumbullakohet poshtë në cent. Kreditet zakonisht shtohen brenda pak minutash pas konfirmimit të pagesës. Për një porosi-dhuratë, kreditet i fiton blerësi.
(c) Kur nuk fitohen kredite. Nuk fitohen kredite për rimbushje, për porosi të paguara me e-Banking ose kripto, për porosi falas ose pako të dhëna nga ne, as për porosi të bëra para 15 shtatorit 2026.
(d) Si përdoren. Kreditet e disponueshme mund t’i përdorësh në arkë për një pako të re eSIM të paguar në euro me kartelë, duke futur të dhënat e kartelës për atë pagesë. Kreditet nuk mund të përdoren me kartelë të ruajtur, me mënyra të tjera pagese ose për rimbushje. Së paku €1,00 e çdo porosie ku përdoren kredite paguhet me kartelë dhe mund të kesh vetëm një pagesë të papërfunduar me kredite njëkohësisht.
(e) Pagesat e papërfunduara. Nëse një pagesë me kredite dështon ose anulohet, kreditet e aplikuara në të kthehen automatikisht në balancën tënde, zakonisht brenda 30 minutash dhe jo më vonë se 24 orë pas bërjes së porosisë. Nëse ajo pagesë megjithatë konfirmohet më vonë, kreditet llogariten si të përdorura.
(f) Rimbursimet. Nëse një porosi rimbursohet plotësisht, kreditet e përdorura në të kthehen në balancën tënde si kredite dhe kreditet e fituara prej saj anulohen. Për rimbursim të pjesshëm ose kthim pagese përmes bankës (chargeback), mund t’i rregullojmë kreditet e fituara nga ajo porosi. Nëse balanca jote bëhet negative, për shembull sepse kreditet e anuluara ishin përdorur tashmë, shuma negative kompensohet me kreditet që fiton më vonë; nuk do të të kërkojmë ta shlyesh me para.
(g) Skadimi dhe fshirja e llogarisë. Kreditet nuk skadojnë për sa kohë programi vazhdon. Nëse e fshin llogarinë, humbin të gjitha kreditet.
(h) Keqpërdorimi. Mund të mos i japim, t’i bllokojmë ose t’i anulojmë kreditet e përfituara përmes mashtrimit, abuzimit me pagesat ose shkeljes së këtyre kushteve.
(i) Ndryshimet, përfundimi dhe pezullimi. Programin mund ta ndryshojmë ose ta përfundojmë për të ardhmen, me njoftim së paku 30 ditë përpara me email ose në aplikacion; kreditet e fituara tashmë mund të përdoren gjatë periudhës së njoftimit. Programin mund ta pezullojmë menjëherë për arsye teknike, sigurie ose mashtrimi; balancat ruhen gjatë pezullimit.
(j) Faturat. Kreditet e përdorura në një porosi shfaqen në faturën e saj si pjesë e pagesës.
Të dhënat e kompanisë
Adresa e regjistruar: Bulevardi Bill Clinton, Nr. 2 SU.2, 10000 Prishtinë, Kosovë
Numri i regjistrimit të biznesit: 811410448
Email: info@priesim.com
Telefon/WhatsApp: +383 48 441 256
Web: priesim.com
Wallet-i i rimbursimeve — alternativë vullnetare
PRIeSIM mund të ofrojë një rimbursim ose kompensim të miratuar si kredi në wallet-in e rimbursimeve të PRIeSIM. Kur kjo zëvendëson një rimbursim monetar që të takon, kërkojmë pëlqimin tënd të veçantë dhe të shprehur para kreditimit. Pranimi i kushteve të përgjithshme ose dështimi i kthimit në bankë nuk përbën vetvetiu këtë pëlqim. Mund ta refuzosh alternativën; të drejtat detyruese të konsumatorit dhe afatet e zbatueshme të rimbursimit mbeten të pandryshuara.
Shuma e dakorduar regjistrohet në EUR në llogarinë tënde, veçmas nga cashback-u promocional. Kredia e rimbursimit nuk skadon dhe nuk ka tarifë përdorimi. Mund ta mbulojë tërë çmimin e një eSIM-i të ri në EUR, pa pagesë me kartelë. Për pagesë të pjesshme, pjesa tjetër paguhet me kartelë të re; arka aktualisht kërkon së paku 1 € pagesë me kartelë. Çdo bilanc i papërdorur mbetet në dispozicion. Kredia e rimbursimit dhe cashback-u nuk kombinohen në të njëjtën porosi. Përdorimi i wallet-it aktualisht nuk ofrohet për rimbushje, kartela të ruajtura ose pagesa kripto.
Nëse pagesa e pjesshme dështon ose braktiset, shuma e rezervuar në wallet lirohet automatikisht, zakonisht brenda 30 minutash për pagesë të dështuar dhe brenda 24 orësh për arkë të papërfunduar. Nëse pagesa konfirmohet më vonë, shuma në wallet zbritet një herë. Bilanci dhe historiku shihen te Kredite në llogari. Për rimbursim të miratuar merret parasysh vetëm shuma e paguar realisht; zbritjet nuk rimbursohen. Kredia e përdorur nga wallet-i rikthehet në wallet, ndërsa cashback-u promocional korrigjohet sipas rregullave të veta. Një rimbursim i përfunduar nuk mund të kthehet përsëri përmes një metode tjetër.
Wallet-i i rimbursimeve është kredi për blerje në PRIeSIM, jo llogari bankare. Nuk transferohet te persona të tjerë dhe nuk tërhiqet zakonisht në para. Këto kufizime operative nuk heqin të drejtën detyruese për rimbursim monetar. Para fshirjes së një llogarie me bilanc rimbursimi, kontakto info@priesim.com që ta zgjidhim; fshirja e llogarisë nuk heq kërkesat që mbrohen detyrimisht nga ligji. Këto dispozita nuk ndryshojnë kushtet e blerjeve të mëparshme dhe nuk i kthejnë kërkesat ekzistuese në kredi pa marrëveshje të veçantë.